189 Views

பரவிய செய்தி :

14-வது மாடியில் இருந்து குதித்து ஜாய் ஆலூக்காஸ் அதிபர் அரக்கல் துபாயில் தற்கொலை! கேரளாவுக்கு உடல் கொண்டு வரப்படுகிறது!!

Facebook link | archive link

மதிப்பீடு :

விளக்கம் :

ஜாய் ஆலுக்காஸ் நகைக்கடை நிறுவனத்தின் நிறுவனர் ஜாய் அரக்கல் துபாயில் தற்கொலை செய்து கொண்டதாக செய்தித்தாளில் வெளியான பக்கம் சமூக வலைதளங்களில் பகிரப்பட்டு வருகிறது. மேலும், சமூக வலைதளங்களில் ஜாய் ஆலுக்காஸ் நிறுவனர் கொரோனா வைரஸ் காரணமாக இறந்ததாகவும் பரப்பி வருகிறார்கள்.

உண்மை என்ன ?

Gulf News இணையதளத்தில், ” ஏப்ரல் 23-ம் தேதி கேரளாவைச் சேர்ந்த இந்திய தொழிலதிபர் ஜாய் அரக்கல் தற்கொலை செய்து கொண்டதாக துபாய் போலீஸ் உறுதிப்படுத்தி உள்ளது . அவர் பிசினஸ் பே கட்டிடத்தின் 14-வது மாடியில் இருந்து குதித்து தற்கொலை செய்து கொண்டுள்ளார். முதலில் அவர் மாரடைப்பு காரணமாக இறந்ததாக செய்திகள் பரவின. பின்னர், ஃபைனான்சியல் பிரச்சனை காரணமாக தற்கொலை செய்து கொண்டு உள்ளதாக துபாய் போலீஸ் தெரிவித்து இருக்கிறார்கள் ” என அறிய முடிகிறது.

கேரளாவின் வயநாட்டைச் சேர்ந்த அரக்கல் ஐக்கிய அமீரகத்தில் இன்னோவா குரூப் உடைய நிர்வாக இயக்குனர் ஆவார். இந்த குரூப், பெட்ரோலியம் மற்றும் பெட்ரோகெமிக்கல் தயாரிப்புகள் சார்ந்த தொழிலை மேற்கொண்டு வந்துள்ளார். அந்நிறுவனத்திற்கு ஐக்கிய அமீரகம், குவைத், சவூதி அரேபியா மற்றும் இந்தியா உள்ளிட்ட நாடுகளில் அலுவலங்கள் உள்ளன.

இந்நிலையில், ஜாய் அரக்கல் பிரபல நகைக்கடை நிறுவனமான ஜாய் ஆலூக்காஸ் உடைய நிறுவனர் என தவறான செய்தி சமூக வலைதளங்களில் பரவத் துவங்கியது. இதையடுத்து, ஜாய் ஆலூக்காஸ் நிறுவனம் மறுப்புடன் விளக்கம் அளித்து இருக்கிறது. துபாயை மையமாகக் கொண்ட தொழிலதிபர் ஜாய் அரக்கலுக்கும் ஜாய் ஆலூக்காஸ் நிறுவனத்திற்கும் எந்த தொடர்பும் இல்லை, தவறான செய்திகள் சுற்றி வருவதாகவும், ஜாய் ஆலுக்காஸ் நலமுடன் இருக்கிறார் எனத் தெரிவித்து உள்ளனர்.

ஜாய் ஆலுக்காஸ் என்பவரால் ஜாய் ஆலுக்காஸ் குரூப் நிறுவப்பப்பட்டது. 1987-ம் ஆண்டு நிறுவப்பட்ட இந்நிறுவனத்தின் தலைமையிடம் திரிசூர் மற்றும் துபாயில் உள்ளது.துபாயில் இறந்த ஜாய் அரக்கல் ஜாய் ஆலூக்காஸ் நிறுவனத்தின் நிறுவனர் என்றும், கொரோனா வைரசால் இறந்ததாகவும் தவறான தகவல்கள் சமூக வலைதளங்களில் பரவுகிறது. தவறான செய்திகளை பகிர வேண்டாம்.

Translate »